妹豬轉院－Feel Great

今朝一早教定鬧鐘8:30起身9點打去大圍預約緊急轉院，點知佢話要收到依家間醫院醫生個病歷先可以做，咁我即刻打去旺角醫院同姑娘講咗要fax病歷去大圍，姑娘話要去見埋醫生先可以寫埋個病歷，咁無計我即刻過嚟見醫生順便攪埋出院手續，我再打去大圍通知姑娘話我要去見完醫生先可以fax到去大約10點前會去到，咁請妳留意吓如果收唔到病歷就盡快打比我我再跟進，去到旺角醫院第一時間見完醫生講返妹豬依家情況都係同琴日咁上下，之後就幫我寫埋個報告，我叫姑娘即刻幫我fax去大圍，之後我打去大圍通知我地依家馬上過去，點知大圍姑娘覆我話今朝booking full晒最快要下午2:30，我話我今朝一早打咗嚟話咗係急診你唔係幫我留咗位咩，我都一直同你地keep住講妹豬個情況你地都知有個咁嘅case啦，佢話因為未收到個報告所以無留位，我話唔係嘛我已經通知晒你地我情況我已經第一時間去攪啦，都話明攪完即刻過嚟你係唔係都應該留定個位比我先呀，我哩邊又已經check out晒，佢話無辦法因為未收到報告，我問有無得urgent case躡個位呀，因為佢地全診所都知道妹豬哩個case架，我打咗好多次電話去，佢死都話唔得最快2:30，我真係頂佢呀，火都嚟晒，如果係咁同我講咁多次電話你係唔係應該問吓我又或者幫我留定個位先呀，我已經唔揀醫生是旦一個都照睇啦，因為老虎醫生放假...好在妹豬情況唔係太差已穩定啫，連人地旺角醫院嘅姑娘都話佢地咁做嘢嘅，都唔識變通，唉!我都無嘢好講，唯有又麻煩旺角醫院幫妹豬再set返鹽水機先，再安置返妹豬上病房，我同老公就只好去食早餐...

到1:30再返去醫院接妹豬，之後打的去大圍，今次睇Dr. Seems曾醫生，好在睇佢，因為平時除咗老虎醫生之外我只會睇佢...

曾醫生問咗我地個事發經過之後我比咗妹豬碌到去門口張相佢睇，睇完佢問我阿仔有無拍片，咁又無喎，因為佢話睇兔仔咁耐都未聽過兔仔會抽筋，連醫學文獻都無紀錄兔仔會抽筋所以佢想知清楚當時個情況，我話無呀，因為當時得阿仔一個係到佢識得影張相都已經好叻...

曾醫生話如果咁嘅情況有幾個可能性...佢講嘅同琴日旺角醫院醫生講嘅都差不多..

1. 寄生蟲上腦影響神經

2. 肝有事毒素排唔走而上腦影響

3. 癌細胞擴散

4. 環境突變影響情緒緊張

依家先要做嘅就係驗血睇吓肝功能正唔正常，寄生蟲嘅話都係食藥而藥昨日旺角醫院已開始比佢食緊所以繼續keep住食晒個療程，至於係唔係癌細胞擴散可以照MRI去確定，但佢唔建議做因為就算確定咗係擴散嘅話都唔可以做到d咩，因為無儀器去做哩種手術同埋妹豬已經太老了都唔適合做...一般兔仔壽命係6-8歲而妹豬已經9歲幾..

咁我地只做驗血先睇吓關唔關肝事，所以我地就放低妹豬係診所4:30再返去睇報告，咁我同老公去食飯先再返去...

4:30準時返到診所報告亦已出咗證實妹豬肝功能一切正常，血色素正常咁即係唔關肝事，所以只可以當癌擴散或寄生蟲，如果寄生蟲影響行唔到或側頭都好常見，有d都會好得返，但曾醫生話好似妹豬咁謝又好少見，所以佢唔認為係寄生蟲但都無辦法只可以照食杜蟲藥去睇吓反應，聽日再覆診睇進展如何但聽日曾醫生例假2日又要另一個醫生跟我又唔係咁想所以就決定等多2日到29號曾醫生返嚟先睇，後來發現原來老虎醫生29號都放完假返不過姑娘話覆診搵返曾醫生會好d所以都book返曾醫生，而曾醫生話妹豬依家情況可以唔需要住院但佢會幫妹豬打定皮下水先，叫我盡量餵佢食草粉同飲水。