玩物喪智－Feel Great

唔好意思呀咁多位，要妳地等咁耐都無新嘢出....

咁大個人都會控制唔到自己，日日係咁掛住打ndsl，攪到日又玩夜又玩飯又唔煮blog又唔寫....

唉...哩個阿媽真係唔要得，仲要同埋個仔一齊玩，兩個係到你個牧場今日點點點，我個牧場今日又咁咁咁....對住部機我地就有共同既話題，唔通咁樣先可以溝通到....

我同 Tommy 仔除咗打機有共同話題之外另一個可以另到我地有共同話題既就係睇卡通片，有好多卡通片我地都會一齊睇一齊笑餐飽，我覺得咁既溝通方法都幾好丫....起碼兩母子都咁高興咁開心....

不過從打機既過程我發現到 Tommy 仔係一個極之急進既人，佢唔會要求自己每一關都攞晒金牌先過版，佢只係要求自己盡快過晒所有版數而去到終點就算....

而我同佢剛好相反，我會要求自己一定要攞到金牌先過版，攞唔到就會從頭來過，總之一定要攞晒先過版無論玩幾多次，當我睇到哩一點我就會諗起我曾經焗既一款蛋糕，失敗過六七八次我都未死心，係都要焗到成功為止，可能我真係有屢敗屢戰既精神....