Feel Great

今日，2008年4月29日做咗一件我人生最大最大既決擇

記得好幾年前經常同屋企人及朋友吹水講我地做父母既唔應該幫小朋友留下太多的東西，免得他大時覺得咩都唔需要努力，唔需要付出，因為爸媽已經一切都幫我預備好 而我亦經常同Tommy仔講將來你大個仔要自己搵錢養自己呀，你爸媽唔會留錢比你架，將來結婚一定要搬出去住唔好同我地一齊住呀...

直至上年我媽咪過身後，我地幾兄妹一同辦理我媽的身後事時先發現原來有兄弟姊妹一齊商量事情係幾咁好架，(當然今次反而我處理得多過我d阿哥啦)

但我亦都係在處理我媽哩次身後事時想起第時如果我或者老公有咩事咁得Tommy仔一個佢點好呢，佢點處理呢? 無任何兄弟姊妹幫手，我只有叫佢記住第時有咩事要搵你d舅父幫手，佢地會教你或者協助你去做....啋啋啋...講埋晒d咁既嘢

講咗一大堆嘢都唔知想講咩....都未入到正題...


無幾耐之前都有同朋友講我住緊和諧式公屋，如果唔係有必要的話都唔會買樓搬出去住，因為公屋租金平，地方又大所以住一世都願，搵幾多錢都可以洗唔使成日顧住要供樓一出糧就唔見咗一節

點知我哩個想法從我媽過身後就有所改變，另一個原因就因為人工加咗我地已經超出入息限價而要面臨交雙倍租金了....

有見及此亦都比我一個想法係咪應該自己買層樓供多幾仟蚊個月好過交雙倍租比政府呢? 如果將來我同老公有咩事得返Tommy仔一個佢起碼都有間自己既屋，唔洗咁可憐丫

於是我同老公就由上年11月就開始睇樓，先睇過藍澄灣，再睇美孚...但都太貴了所以無結果

之後老公個同事話你地既然有間公屋係手點解唔用間公屋來換間居屋呢? 因為我一直都覺得我一係唔搬，搬就當然住私家樓啦，住居屋不如住返公屋啦都無咩分別

點知老公有個同事就係住係我地下村既居屋，佢叫我地上佢屋企睇吓d間格先啦都唔錯架...

咁我就同老公上去睇過，睇完之後另我對居屋完全改觀，既然我地無咁多錢拎出來比首期買私家樓咁用間公屋換居屋就最好啦，首期都係比5%...

我同老公相量過之後都覺得係喎，好....一於去下村搵d地產睇吓有無咩2手盤放出來，點知原來哩個村既居屋係好搶手既而且放盤既亦少，我地又未申請准買證，所以我地一定要做個證先可以再搵單位，原來做個咁既證要成3個星期...

終於到今年1月頭收到個證了，而我地亦都從報紙上得到消息今期重售既居屋正正有我想要既下村，所以都係唔睇2手市場盤住一於等房署重售居屋啦

唉...好辛苦先等到2月有表攞，3月攪珠，點知一睇個攪珠結果排到成84組，oh my god....咁即係無運行啦...成世都無抽獎運既，抽現金禮物獎就話無啫，真係估唔到連抽籤排位都無運既

老公既同事又同老公講如果你想要既地區無既點解唔揀另一個係旺角既富榮花園呀，果d居屋係私人參與，個實用律又高d都有8成半架，個廳又好用...

好...我地一於出去睇吓個示範單位先，順便去地產到睇吓有無咩2手盤，因為我地排得後所以揀到重售既機會都好微，都係要係2手市場先會有d機囉...


真係唔出去睇都唔知，原來又真係幾好喎，單位四正又有view...一睇完老公都話唔錯可以決心買哩到唔買下村了，因為老公係旺角人好近佢舊屋企，佢好有歸屬感呀

係展轉睇過8個單位之後，我地終於決定買最後睇那個單位，係"向海嵐"來架....即係向南樓有海景仲可能可以睇到煙花添

所以我地就係2008年4月29日作出我一生最大最大既決擇，就係買居屋喇....而哩個決定有一半都係為咗Tommy仔既將來，所以都免強可以叫做"母親的決擇"呱...哈哈哈!!!

唔好意思嚇親大家...